خليها تعاندك وانت عاندها
لو قفلت بابها أوعى تسيبها
خبط تاني واياك تيأس هي بتتقل فأنت حايلها
هتجيب حزن وهتجيب هم خليك أقوى من ألاعيبها
جايز تتعب جايز تزهق اصبر صبرك هو علاجها وهو طبيبها
لما تكشر ومنك تهرب اضحك انت وأقرب ليها
صدماتها كتيرة أوجاعها كبيرة افتح أحضانك ورحب بيها
لو هي بتبخل خليك انت أكرم منها
هتمنع عنك أمانيك وتخليها سراب فى عينيك اثبت على اصرارك وأكيد هتلاقيها
كل ما تقسى حن عليها حبها وحب كل ما فيها
هتملاك خوف وقلق اطمن وألجأ للى خلقك فيها
فى هوجتها ممكن تبعد عنه وتتوه وتنسى ان هو اللى قادر عليك وعليها
ارجع لربك واطلب رحمته وانت تشوف تدبيره فيها
وانت معاه عمرك ما تخيب هيسخرلك كل حياتك وكل شئ على أراضيها
حياتك مش كلها شقا ولا الهنا هو كل ما فيها
حياتك فيها مرها وفيها حلاوتها وشئت أم أبيت هى دى سنتها
يبقى ليه تغلبك لما ممكن تغلبها ليه تبقى مجبر لما ممكن ترضى بيها
ليه مبتشوفش غير الوحش لما ممكن تعيش وتشوف أجمل ما فيها
جدد أملك وأقوى ارادتك خليك واثق انك قادر عيشها بجد واتمتع بيها
الرئيسية 
